’’مولانا حمید الدین فراہی :علمی وفکری میراث ‘‘پر بین الاقوامی سیمینارشروع

اعظم گڑھ: آج بتاریخ 24 مارچ 2018 بروزہفتہ شبلی نیشنل کالج اعظم گڑھ کے کانفرنس حال میں دی مسلم ایجوکیشن سوسائٹی کے اولین سکریٹری مولانا الامام حمید الدین فراہی کی حیات خدمات خصوصاً آپ کی تفسیری اورعربی ادب نحووقواعدپرمربوط مجموعی خدمات کو نسل نو تک پہنچانے اورمرحوم کی علمی جلالت شان سے آگاہی فراہم کرنے کے مقصد سے دوروزہ بین الاقوامی سیمیناربعنوان الامام حمید الدین فراہی: علمی و فکری میراث “کا افتتاح ہوا۔ افتتاحی تقریب کی صدارت پروفیسر الطاف احمد اعظمی نے کی، مہمان خصوصی ڈاکٹر محمد اقبال فرحات پروفیسر شریعہ کالج قطر یونیورسٹی، مہمان اعزازی ڈاکٹر حسن یشو پروفیسر شریعہ کالج قطر یونیورسٹی، اور مولانا شکیل احمد اعظمی، چیئرمین ابن ہیثم اسلامک اسکول بحرین رہے۔ پروگرام کے آغاززیاد احمدکی تلاوت کلام پاک سے ہوئی۔خطبہ استقبالیہ سمینار کے کنوینر ڈاکٹر محی الدین آزاد اصلاحی نے پیش کیا۔بعد ازں موضوع تبدیلی کرتے ہوئے شبلی اکیڈمی کے ڈائریکٹر پروفیسر اشتیاق احمد ظلی نے کہا کہ علامہ حمید الدین فراہیؒ اس طرح کے عظیم کمالات کے حامل تھے کہ ان کی علمی عبقریت کا احاطہ کرنے میں الفاظ بھی ہماراساتھ چھوڑ دیتے ہیں۔مہمان ذی وقار مولانا شکیل احمد اعظمی بحرین نے اپنے پرمغزخطاب میں کہا کہ مولانا فراہیؒ نے اگر کسی فن یا موضوع پرایک صفحہ بھی لکھ دیا ہوتو اس پر ایک مکمل کتاب لکھی جاسکتی ہے۔ دوسرے مہمان خصوصی ڈاکٹر حسن یشو قطر یونیورسٹی نے کہا کہ مولانا فراہی علم کا ایک ایسا سمندر ہے جس کی کوئی انتہاء نہیں ہے۔آپ کے کارناموں پرعالم عرب بھی آج محوحیرت ہے۔مہمان خصوصی ڈاکٹر محمد اقبال فرحات پروفیسراصول فقہ شریعہ کالج قطر یونیورسٹی نے کہا کہ مولانا فراہیؒ آج بھی تحقیق و تدقیق کے پہلے مقام پرفائزہیں۔حضرت الامام فراہیؒ نے جو علمی میراث چھوڑی ہے اسے ہم سبھی کوخاص کر اعظم گڑھ کے لوگوں کو آگے بڑھانے کا فیصلہ لینا چاہئے۔اپنے صدارتی خطاب میں پروفیسر الطاف احمد اعظمی نے کہا کہ مولانا فراہیؒ نے اپنی تحقیق و جستجوکا موضوع اللہ کی کتاب قرآن کوبنایا، مولانا حمید الدین فراہیؒ قرآن کے ماہر ہونے کے ساتھ ساتھ قدیم اور جدید علوم یکساں ماہرتھے اور متبحر عالم تھے۔مرحوم کے وسعت علم کااندازہ اس سے بھی لگایا جاسکتا ہے کہ مولانا فراہی نے ارسطو کی بہت سی غلطیوں پر گرفت کی ،جبکہ بڑے بڑے سورما ارسطوکے فلسفہ اور منطق کے آگے مرعوب نظر آتے ہیں۔آپ نے ارسطو کی منطق کو غلط ثابت کرتے ہوئے اپنے موقف کو قرآن کریم کی روشنی مدلل بھی کیا ۔ انہوں نے یونانی فلسفہ کوبھی اپنی توجہات کا مرکز بنایا اورانتہائی دقیق تنقیدی مطالعہ بھی کیا ۔مولانا فراہیؒ کا خیال تھا کہ جو شخص منطق نہیں جانتا وہ اپنے علم سے کماحقہ مستفید نہیں ہو سکتا، انہوں نے مولانا فراہیؒ کا تقابل یونان کے مشہور فلسفی ارسطو سے کیا اور بہت سے پوشیدہ پہلوؤں کو بھی اجاگر کیا۔ مولانا فراہیؒ علوم دینیہ میں منصب کمال پر فائز تھے ساتھ ہی آپ علوم متداولہ اور عصری علوم سے بھی آراستہ تھے۔پروفیسر الطاف احمد اعظمی نے زور دیتے ہوئے کہا کہ ہم لوگ فراہیؒ تو نہیں بن سکتے لیکن ہم لوگوں کو فراہی اسلوب کے مطابق فکر وتدبر کی راہ ضرور اختیار کرنی چاہئے۔عالمی سیمینار کے افتتاحی سیشن میں ڈاکٹر اورنگ زیب اصلاحی ،شعبہ عربی جامعہ ملیہ اسلامیہ کے زیر ادارت شائع ہونے والی علمی وتحقیقی رسالہ ’’مجلہ الہند‘‘ کے خصوصی فراہی نمبر کا اجراء بھی عمل میں ۔یہ مجلہ عربی زبان میں ایک بیش قیمت اور ضخیم کتاب ہے جو امام فراہی کی علمی وفکری جہات کے تمام گوشوں کا احاطہ کرتاہے۔آخرمیں کلمات تشکر پیش کرتے ہوئے کالج کے پرنسپل ڈاکٹر غیاث اسد خاں نے کہا کہ اس کالج کی بنیاد میں علامہ فراہی کی تمام کوششیں شامل ہیں یہ فرض تھا کہ مرحوم پر اس قسم کے تاریخی اور منفرد سیمینار بار بار کئے جاتے ،مگر دیر سے ہی سہی کالج کو یہ سعادت ملی کہ اس نے اپنے محسن کی قربانیوں کو داد تحسین پیش کرنے کا موقع حاصل کرلیا۔ اس موقع پر سمینار کے میڈیا انچارج ڈاکٹر شفیع ا لزماں اور ڈاکٹر شباب الدین، ڈاکٹر ووصی الدین ایڈوکیٹ، محمد نعمان چارٹرڈ اکاؤنٹنٹ، محمد اسلم، فیروز طلعت، ڈاکٹر شوکت علی، ڈاکٹرقمر اقبال، ڈاکٹر جاوید علی عبدالمعبود، مولانا طاہر مدنی، ڈاکٹر گیان پرکاش دوبے، ڈاکٹر محمد ارشد، ڈاکٹر بابر اشفاق، ڈاکٹر مکرم علی، محمد رافع، ہرمندر پانڈے، ڈاکٹر انیس احمد خاں، ڈاکٹرالحنان، مرزا وسیم باری بیگ، ڈاکٹر محمد طاہر، ڈاکٹر اورنگزیب، توقیر شیروانی، مرزا اسد بیگ (منا) وغیرہ اور شہر کی معززشخصیات موجود رہیں۔ افتتاحی سیشن کی نظامت شعبہ تاریخکے صدر ڈاکٹر علاء الدین خاں نے کی۔ اس موقع پر سمینار کے شریک کنوینر ڈاکٹر نازش احتشام اعظمی کی شراکت قابل ستائش رہی۔بعد ازاں سہ پہر تین بجے سیمینار میں مقالہ نگاروں نے اپنی تخلیقات پیش کیں ، اس سیشن کی صدارت مولانا طاہر مدنی نے کی ،جبکہ مقالہ نگاروں میں ڈاکٹر اقبال فرحات،ڈاکٹر حسن یشو،شفاء الرحمن ،ریسرچ اسکالر جامعہ ملیہ اسلامیہ اور بشیرالدین شرقی وغیرہ کے مقالے نہایت دستاویز اور پسندیدہ قرار پائے۔