مرکزی جمعیۃ علماکی جانب سے ضرورت مندوں کے درمیان راشن تقسیم

نئی دہلی: /8اپریل :اس وقت کورونا وائرس کی وبانے ایک عالمی بحران پیدا کردیا ہے۔ وطن عزیزبھی اس بحران سے دوچارہےـ ملک کو اس لاعلاج وبا سے بچانے کے لئے حکومت نے سوشل ڈسٹینس بنائے رکھنے کی غرض سے مکمل لاک ڈاؤن نافذ کر دیا ہےـ ظاہرسی بات ہے کہ موجودہ صورتحال میں غریبوں اور یومیہ مزدوروں کے لیے روٹی کا انتظام سب سے اہم مسئلہ بن گیاہے۔ آفت کی اس گھڑی میں مرکزی جمعیۃ علماء کے زیر انتظام ضرورت مندوں کی مدد کے لیے فوری وہنگامی قدم اٹھایا گیا ہے، جس کے تحت یومیہ مزدوروں اور دیگر مستحقین تک الحمدللہ تقریباً ڈیڑھ سو سے زیادہ خاندانوں میں راشن کٹ تقسیم کیاگیاہے، جس میں اب تک پندرہ سو 1500کیلو چاول، دوسو دس 210کیلو دال،600 کیلو آٹا،180کیلو چینی،پچاس کیلو چائے پتی اور 120کیلو خوردنی تیل شامل ہیں۔
مرکزی جمعیۃ علماکے جنرل سکریٹری مولانافیروزاخترقاسمی نے حالات کی نزاکت کے پیش نظر صاحبِ استطاعت مسلمانوں سے اپیل کی ہے کہ اس ابتلائے عام میں اپنے پڑوسیوں اور قرب و جوار میں دیکھیں ـ اگر کوئی شخص یا خاندان کھانے پینے کی پریشانی سے دوچار ہوتو اس کا پیٹ بھرنے کی ہرممکن کوشش کریں۔ اس وقت اس سے بڑی نیکی کوئی اور نہیں ہوسکتی۔ اللہ ہم سب کو ہمدردی وغم خواری کی دولت سے سرفراز فرمائے۔ آمین